百利火鍋海鮮酒家 (已搬遷) 新店位置

太子百利一向係文公子飯堂，剛剛話租約期滿，7月份重新裝修完再開，但侍應同收銀好多新臉孔，似乎有新股東入股？不過仲係成日無位要等餐死...大熱天時人氣似乎不減。裝修後，環境靚咗好多，起碼洗手間企理咗，以前基本上唔想約女仔來打邊爐的。個餐牌加咗日式刺身，連火鍋料都多咗唔少，有午餐肉，炸響鈴同芝士腸食，但海鮮就似乎少咗文公子最愛的花蛤，以前試過好幾次，上碟時都仲識行識走~不過當晚似乎剛剛打完風後，要咩無咩，有點掃興，仲同隔離檯亂咗單，而個冬瓜瑤柱田雞鍋，得嗰些少田雞...完全係搵笨。不過新張期內繼續睇人頭送Asahi ，碟手切本地牛肉亦似樣，牛滑照樣煮起有山竹牛肉感覺，無得輸~其他雞腸，腰膶，水餃，四寶丸都對辦就算佢啦！