鮮一夜火鍋 (已結業)

同M佬去咗一個10幾日嘅long trip，你問我哋最掛住嘅味道，一定係打邊爐！之但係周街都係火鍋店，而位於荃灣嘅鮮一夜火鍋嘅最大賣點就係：鮑！參！翅！肚！餐廳行半放題路線，嗰套餐名叫「一夜皇御套餐」，好似好勁揪，等我哋試下掂唔掂。五色刺身拼盤一開始食嗰刺身先，有三文魚、帶子、赤蝦、希靈魚同北寄貝。新鮮冰凍，三文魚厚切肥美，北寄貝爽口鮮甜，正。鮑汁扣海參併溏心靚鮑魚嘩，第一個重點到啦！餐廳用料一啲都唔馬虎，採用澳洲鮑魚同南非海參，而且炆得夠晒腍，鮑魚彈牙，海參爽口軟滑，配埋嗰濃郁嘅鮑汁，真係無得彈。紅燒花膠翅湯底厚身，店員話嗰湯底係用鮮雞熬足3個鐘，唔怪得之咁香濃。花膠腍身，魚翅爽口，真係好正。即炒奇妙雞煲有大中小辣畀大家揀，我哋揀咗中辣，非常香口，雞件嫩滑，不過如果加多啲洋蔥、蒜頭同香草，會更加惹味。火鍋湯底6款湯底，任君選擇。有藥膳養身、重慶麻辣、杏汁豬肺、養生椰子雞、香濃豬骨同芫茜皮蛋。我哋揀咗藥膳養生鍋，一打開就有好香濃嘅藥材味，有紅棗、杞子、黨參等藥材，仲有大大舊豬骨，非常足料。航母海鮮拼盤拼盤有基圍蝦、沙白、生蠔、貴妃蚌同青口，非常新鮮。其中基圍蝦肉實味濃，沙白鮮甜無沙，生