御品千の味刺身壽司專門店 (美居中心)

營業中

休息中

好鐘意食甜蝦，之前睇新假期知道有88蚊甜蝦放題先一直記得呢間野，雖然知道一早無左88放題優惠，但而家有一蚊一隻甜蝦。睇哂餐牌餐紙，決定叫左個二人餐。三文魚、甜蝦、油甘魚刺身正常，油甘魚麻麻地，整體尚算新鮮，但我更喜愛食細細隻既甜蝦，覺得會比呢種鮮甜一點。燒汁牛肉飯飯好硬，面上既牛肉同洋蔥煮到好難食，牛肉太過熟，好似食緊布渣甘，真係好唔掂，成餐飯最難食。食食下仲要食到有塊膠係到，無奈。三文魚冷麵三文魚切到一粒粒易入口，感覺份量都幾多下，可惜醬太多，偏咸。軟殼蟹天婦羅我係好鐘意食軟殼蟹既人黎，但呢個係我食過最難食，食到中間真係好咸，食到腳既時候成口油，味道口感完全唔合格。吉列炸蠔炸得好好，表皮熱辣辣得黎夠鬆化，可惜蠔唔新鮮，完全無蠔味，其中一舊咬開直頭滲水出黎。如果唔係因為有點沙律醬，就等於完全無味既一舊野。飲品選擇少，唔想飲汽水，所以揀咗菊花茶、檸檬茶。女侍應應該新請返黎，基本問題都唔識答，覆單錯，問可唔可以收信用卡答應該可以轉頭又話只收現金，問轉烏龍茶要加幾錢唔知。唔想浪費食物，淨係想快快食完快d走，真係絕無下次。