海魂燒 (已結業)

今日去天后探朋友，去左佢屋企附近呢間叫「海魂燒」嘅日本餐廳食飯。餐廳入面裝修比較簡單，不過都幾有日式小店風味。餐廳以燒物同海鮮做主打，所以我地都叫左燒物、鐵板同海鮮丼。鹽燒雞翼，賣相唔錯，燒得剛剛好，外皮香脆，內裡雞肉嫩滑，淡淡咸香已經好惹味。鹽燒雞軟骨，味道亦都唔錯，非常香口。鐵板日本和牛，提供鐵板燒烤爐，自己落手落腳燒，日本和牛紋理清晰，一片都幾厚身，灑左鹽同胡椒調味，配菜有番茄、洋蔥、生菜、蘑菇片，先用牛油燒熱鐵板，然後落蔬菜，之後再燒和牛，兩面烤一烤，唔駛燒太耐已經食得，入口即溶，肉質鮮嫩多汁，味道非常好。黑松露溫泉蛋三文魚海膽石鍋丼，黑松露同海膽係我嘅至愛，兩樣夾埋超好食。海膽色澤黃橙，非常新鮮；淡淡松露香味配香甜珍珠米，再加上溫泉蛋，口感豐富；燒三文魚淋上醬汁，味道甘香甜美。呢頭石鍋丼味道唔錯，一個飯兩個人分都已經好飽肚。青檸柚子梳打，賣相幾得意，用貓頭鷹玻璃杯裝住，大大杯，清爽解渴。