輕鬆一下 (已結業)

今朝要做早job,所以要去葵芳轉地鐵，順便食個早餐，其實呢間輕鬆一下我幫襯咗佢20年，想我當年係喺3号4号碼頭返工已經開始幫襯佢，所以而家一場嚟到就順理成章都一定幫襯佢食早餐，點知一坐底見到個餐牌，一個麵35蚊仲要咁少配料，餐包都無一個！本來我想叫雪菜肉絲蛋麵，佢話蛋要加6蚊，所以我唯有叫餐蛋麵凍奶茶，即35+2蚊！我心諗乜而家物價真係貴咗咁多咩？我喺荃灣同荔枝角食早餐都唔係咁喎！我放低影相架餐行過兩步去草根食堂睇，見到佢地早餐雪菜肉絲雞扒公仔都係31蚊😱我再行返過去坐返低等我個餐蛋麵，見老闆拎凍奶茶比我，我就同佢講我所見所聞，佢竟然咁答我：佢地買咗舖，唔駛交租，所以佢賣20蚊都有會賺，我地要交租80萬，又要出糧比伙記，成本好高！我心諗:你交80萬租關我乜事？如果你賺80萬會回饋比我咩？你開得舖做得生意賺得錢就要自己計住啦！我只知道，我行多兩步就可以食到31蚊雪菜肉絲雞扒公仔麵咋！我只係一個食客，食完就走，唔會諗你咁多！我當然無同佢講咁多，講嚟都嘥氣，因為我真係食完就走！結果個麵到咗，得一塊餐肉一隻蛋，餐肉仲要凍冰冰硬屈屈，肯定煎咗好耐🤮，毫無誠意😡我食完心諗，以後再見多謝大家睇晒🙇‍