桃園制作粥麵餐廳 (海悅豪園) (已結業)

平時食晏時間好多時會經過呢間桃園，今日終於嚟呢度食早餐喇。入面都幾大，唔逼，雖然服務麻麻，但係早餐種類多：有英式早餐，粉麵，粥，連糭，炒麵，魚肉燒賣，豬腸粉等等都有，味道亦可以。香煎雞扒湯米線配半焗流心蛋，加$3蒜香牛油厚多士，都係一般嘅早餐茶餐湯米線，味道正常，多士夠厚。運“賬”腸粉拼燒賣、蘿蔔糕，同事貪得意食，蘿蔔糕煎到有啲黑不過無燶味，其他都係同街邊買嘅小食差唔多。吉列魚柳·鮮奶炒滑蛋配餐肉，+$6輕量火腿絲通粉，魚柳都算大件同厚，唔會炸得太乾，多士一樣厚又，而且搽上面牛油蒜茸都幾多，通粉嘅湯幾濃但唔會過鹹，我覺得呢間嘅通粉好味。溏心皮蛋瘦肉粥配地道油炸鬼，無咩好鞋嘅肉絲喺裏面，剩係有又綿又夠味嘅粥底同皮蛋，油炸鬼新鮮又脆，呢個套好味。火腿炒蛋菠蘿包，應該唔係新鮮出爐，似客人點餐後再入焗爐加熱，不過酥皮都係脆，有少少乾，都可以嘅。