北方餃子源 (砵蘭街)

營業中

休息中

依間之前係灣仔返工嘅時候食過，覺得啲嘢食都整得幾好，不過對打工仔嚟講佢單點唔算平，所以之前食都係食佢嘅lunch set多，價錢平民化啲。前幾日係旺角行行下又見到佢，原來旺角都有分店，最好嘅係果個時段啱啱有 tea set，我當然係咩都冇諗，直接衝左入去試下依間又得唔得啦！下午茶選擇好多，價錢仍然keep到大眾化，原本諗住食佢嘅招牌餃子，不過見到人地叫嘅豬扒担担麵果樣都幾得吓，所以臨時轉左軚！未食先睇賣相，炸豬扒同麵係分開上嘅，咁豬扒就唔會咁容易林哂。豬扒屬薄身，並且已經切好，比較容易食啲，特別嘅地方係面頭加左一堆蔥爆香蒜，用嚟送豬扒特別惹味! 至於麵就用左幼身果隻，容易吸湯。湯底睇色就知係好濃果隻，上面放左肉碎，豆腐粒同花生，撈埋一齊食fit哂！跟餐可以揀豆漿，汽水同山楂茶，我就揀左山楂茶，因為其他地方比較少見有，飲落都好清新吓，用嚟解辣一流！希望下次嚟嘅時候可以多啲人嚟試多啲嘢啦！