獅叔 (已結業)

發現最近好耐冇食星馬菜啦，所以上星期約咗朋友嚟位於旺角嘅獅叔食飯。店Shiok 可以解為「好正！」既意思！呢度裝修顏色鮮明，而且座位幾寬闊，坐得舒服今次呢就同朋友試咗兩個主食。「檳城蝦麵摻摻」湯底唔係用叻沙，無咁濃，但都有蝦既鮮味。麵線係用左油麵同米粉，份量都唔少。幾隻大蝦真係好大隻，咬落爽口彈牙添。仲有幾片油炸鬼，浸湯後半淋半脆，口感變得豐富。辣死你媽係炸雞脾飯，雞脾都幾大隻、多肉。配埋下面嘅魚乾同埋辣醬，食落都惹味！我地幾鐘意「馬來沙爹串燒」，佢哋嘅沙嗲醬花生味道突出。今次呢就揀咗豬肉串燒，食落都豬肉唔鞋，而且都多汁。難得嚟食星馬菜，一定試咖央多士。佢地既「咖央雪油烤吐司」非常邪惡😍。烘過既多士中間塗上咖央，再放入一塊牛油🧈，味度甜甜地，烘熱麵包慢慢將牛油溶化，食落更香口！我哋仲試埋另外一款甜品「咖央蘋果脆金寶配雪糕」，味道都唔錯👍🏻。食落有點甜，咬落有粒粒嘅蘋果肉，口感都唔錯，配埋一球雪糕就唔怕Dry。整體來講呢，呢度星馬菜嘅食物都唔錯，而且因應香港人嘅口味有作出調整。大家經過旺角，不妨嚟試一試啦～