亞參雞飯 (已搬遷) 新店位置

今日喺旺角行街行完之後要搵地方醫肚見到呢間亞參雞飯，主要食東南亞嘢星馬菜，試吓新口味平時少機會食。見到佢晚市價錢唔係特別貴，首先要左兩款小食，一款係馬來咖咉多士，呢款小食要趁熱辣辣食咗先，因為佢多士烘到香脆，之後中間夾住厚切牛油同埋咖咉醬，麵包嘅熱力會整到中間嘅餡料半溶狀態，一啖咬落去層次好豐富。另一款係脆蝦餅，呢款蝦餅唔同平時我哋食開嘅泰式炸蝦餅，佢係直接好似用緊蝦膠整成嘅蝦餅，所以肉質比較彈牙，好食！主菜係海南雞飯，佢會跟個雞湯。呢款海南雞係屬於新加坡嗰隻，所以會有三種醬。一個係辣醬，一個係黑豉油，同一個係薑蓉。雞肉都會比較嫩滑，採用文東雞，啖啖肉，精粹係配上油飯，惹味很多。另一款係明爐酸辣亞參魚，魚大大條，唔會好多碎骨，魚肉分明，容易進食。佢上面有好多番茄香洋蔥等，食落酸酸甜甜好開胃，用來配飯一流。另外兩杯嘢飲，柑桔特飲同薄荷特飲，夠哂清爽解膩！