水蜜桃冰室 (已結業)

聖誕節到喇，為咗唔想同人逼，我每年都會提早食聖誕大餐！今次喺旺角發現一間平靚正嘅cafe，一定要介紹比大家知！呢間餐廳叫水蜜桃冰室，喺通菜街，一入到去好有懷舊氣氛，播著音樂，好似入咗時光機咁。我哋一打開餐牌，見到好多野都好想叫，跟著就諗到一人叫一個set！先來一個南瓜濃湯，配上脆卜卜嘅蒜蓉包，好正！我叫咗一個鐵板燒紐西蘭西冷配薯菜，侍應哥哥好貼心，幫我淋上黑椒汁，香噴噴，之後再加小小清酒，再點火，好似個火焰牛排咁，又玩得又食得，個薯條好脆，西冷有小小肥，先好食，塊排大個我塊面，又稔，真係堅抵食！我朋友叫咗個熊本一口牛套餐，而家做緊個六五折優惠，牛肉有雪花，脂肪分佈均勻，又得自己燒，好好玩，配埋飯一齊食，平凡中的不平凡！除咗以上嘅套餐，我地太饞食，又叫多一個汁燒鰻魚蛋包飯，鰻魚一大條，又燒得香，蛋又濃味，真係唔錯！呢度嘅小食都唔錯啊，日式蟹肉炸薯餅脆卜卜，芝士焗田螺好香芝士味！最後食個由日本嚟嘅鮮果雪葩，我地分別揀咗個椰子雪葩同南瓜雪葩，椰子雪葩夠甜，又滑；南瓜雪葩ok！今年嘅聖誕節真係好難忘，推薦大家去試下！