村上居酒屋 (已結業)

今日阿仔又要去朗豪坊度睇巴士， 睇巴士之前我哋喺附近搵下有咩食， 行到砵蘭街附近， 見到有間居酒屋， 有做午市定食， 睇個餐牌覺得ok所以入去試下， 見餐廳其實有一個五人同行一人免費嘅優惠， 但係我哋當日得四個人所以享用唔到， 餐廳內裝修都幾有日本風， 座位主要以卡位和半卡位為主。燒牛肉拉麵定食呢度嘅定食配菜都幾多， 有沙律，魚生， 卷物， 仲有雪糕糯米糍， 幾抵食， 味道方面沙律菜夠爽口配日式芝麻醬， 三文魚刺身夠鮮味， 燒牛肉燒得夠香口， 唔靭， 個燒汁味道唔錯 ，唔會過甜。銀鱈魚西京燒定食銀鱈魚燒得好有焦香味， 肉質幾嫩滑， 點少少蛋黃醬配飯一流。壽司刺身定食呢個定食配咗沙律，拉麵 ，麵豉湯， 拉麵和麵豉湯都正常味道， 壽司有三文魚， 油甘魚，立魚， 帶子， 刺身有油甘魚和三文魚， 雖然係壽司定食但係就魚生料都唔馬虎， 切得幾厚， 幾新鮮。總括呢度嘅午餐定食都幾抵食， 幾啱附近嘅打工仔一班同事落嚟食飯。