大本瀛日式放題

營業中

休息中

嚟到星期日brunch time梗係要食豪啲，知道個朋友最鐘意食日本嘢，就同佢嚟食個抵食lunch放題，由12點食到3點都係$188，唔洗排隊又可以坐低慢慢食，靜靜地傾吓偈。有成15款刺身任食，幾乎叫哂咁滯，推介珍寶帶子同珍寶赤蝦，兩樣都好鮮甜，三文魚厚切夠大片，劍魚腩油脂十足。友人點了冬蔭公湯，以為只是一人前嘅小碗份量，點知原來係一！大！鍋！除咗個湯夠酸夠惹味，仲好足料，菜、蝦、豆腐、菇類食極都仲有。壽喜燒牛肉鍋亦如是，都係一大鍋，有大量牛肉又有菜，味道唔錯再嚟壽司同刺身迷你飯，刺身飯好足料，伴以青瓜、玉子、蟹子，見朋友食得好滋味一啖都冇剩。焗蠔、焗帆立貝、吉列炸蠔、天婦羅都出色，樣樣都即叫即做，唔會話灘到凍咗，上碟放入口仲熱辣辣咁至叫正。冷盤小食最好係可以細細份叫，即使得我地兩個人食都可以試多幾個款式。中華沙律、川椒皮蛋、白雲鳳爪、胡麻豆腐，樣樣都係我至愛，一次過可以食哂真係好滿足！最有驚喜嘅竟然係意想不到嘅榴槤炸彈！好似迷你煎堆嘅外皮，脆得嚟又煙韌，內裡係沸騰流心嘅榴槤餡，認真冇得頂！