嚐喜大不同特色餐廳小廚

營業中

休息中

趁住早兩日天氣又凍返🌀梗係要捉緊食煲仔飯🍲嘅機會啦，今次就來到位於天后嘅小菜餐廳《嚐喜大不同特式餐廳小廚》，聽聞呢度嘅煲仔飯係用炭燒，之前都有朋友來過，飯後都一致好評👍另外，餐廳除左煲仔飯出名之外，仲會有各式各樣大排檔嘅小炒。提提大家，來呢度食飯最好預先book枱，因為當晚我地六點坐低之後，隔左一陣已經差唔多坐滿曬。同埋餐廳要預留食材，有啲餸菜需要前一日打電話去留定。~🤩梅菜肉餅飯(HKD85) & 白鱔排骨飯(HKD90)煲仔飯嘅份量唔係好大，唔大食嘅話，一煲夠一個人食。我同女朋友兩個人就決定一人叫一煲再另外叫個小菜試下。先講下煲仔飯上面嘅餸先，調味恰好，唔會掩蓋到食材本身嘅鮮味，相信係餐廳對自己挑選新鮮食材嘅信心。到主角煲仔飯，我覺得廚房師傅係有用心去烹調，因為用炭燒嘅情況下，啲米飯粒粒分明，唔會太多水一「pat」亦唔會太乾身。當然，煲仔飯其中一個主角「飯焦」都非常出色，咬落香脆可口，但又唔會太燶。我地兩個眨下眼就食曬兩煲飯。🤩大不同小炒皇(HKD108)我地驚唔夠飽所以就叫多碟小炒皇試下。用料豐富，蝦仁同蝦乾size都唔細，調味略厭重味左些少，不過用來送啤酒嘅話重味些少亦無不可。