暢和麵家 (已結業)

本來下午一點已經食左個正式lunch，但素聞香港西區好多正野食，所以心血來潮想食多個「下午茶」去到暢和，見到係一間比較簡樸茶記風既鋪頭，有別一般麵檔會聞到陣陣鹼水味。本身未算好有期望，諗住食個豬雜米過下癮就算。點知呢個時侯俾我見到牆上貼咗一張印住藥膳醉雞，即刻心心眼落order！入正題。。。藥膳醉雞當歸味十足，而且酒味濃郁，相信酒既份量比坊間多，同時每一啖湯都飲到紅棗同圓肉帶黎既甜味。 藥味、酒味、甜味三者平衡得勁好，以味道黎講可以稱得上係最強藥膳醉雞。由於已經食咗lunch嘅關係，我食晒成碗米已經好飽，飽到胃痛嗰隻，但個湯真係非常之好飲，我都忍唔住一啖一啖咁飲落去，一路痛一路飲、一路痛一路飲。。。一句講晒，唔試你會後悔。至於豬雜米，相對地會比較失色，但都係好出色嘅，豬膶厚度同熟度剛好，喜歡食豬膶既人一定收貨；豬腰既尿騷味已經處理到最好；其他雜位都非常乾淨，配合清爽帶鮮既湯頭，作為下午茶十分合適。 （我本人係朋友果碗度每樣都食左啲，主力都係食番藥膳醉雞果邊）仲有杯紫薯奶茶，本來以為係噱頭嘢，點知佢味道同口感都混合得唔錯，成件事係好夾嘅，唔會有一方偏重咗而導致口味錯配，值得一試。