滿屋日本料理 (大鴻輝(荃灣)中心) (已結業)

今日放假同朋友見面，佢提議食放題，唔洗趕住短時間還檯又可以任食。揀咗呢間滿屋放題餐廳，朋友鐘意佢最高價錢個款極緻組合套餐有得食松葉蟹同大拖羅，仲要清酒梅酒任飲。朋友就首先點左佢鐘意嘅蟹先，蟹肉鮮甜，味道濃郁，蟹腳夠晒長又實肉，啖啖蟹肉，好滋味！之後就由凍盤同刺身開始啦，佢出面有個日式前菜吧同凍盤海鮮吧，我地個價錢有包嘅大拖羅當然要試，其他刺身款式亦多，點左唔少赤蝦同帶子，油甘魚等刺身，最正係有埋海膽，佢有唔同搭配嘅海膽可選，淨係食刺身都好滿足！食完一輪刺身過後，就開始試下唔同既壽司熱食，一次過試左好多唔同類型嘅食物，碗仔翅，花膠，椒鹽雞軟骨，咖哩炒蟹，炸榴槤等等估唔到嘅都有。再試埋日式串燒，款式多到不得了，牛舌，羊架，比目魚，牛柳粒，京蔥肉串等。至於卷物，欣賞店鋪唔會整到好大舊，可以試道唔同款式同味道。天婦羅又係一絕，熱辣辣炸起，外皮漿薄脆，夠晒邪惡。值得一讚，就算唔喺我地個個級別可以飲酒，飲品選擇都好豐富，唔會得汽水同甜飲品，有冷泡茶系列。而且餐廳嘅服務都好，上菜，收碟都快，整體服務，食物同埋飲品都好令人滿意！