焱燒串燒專門店 (已結業)

雖然平時鐘意食日本野多，但港式野都有佢既魅力，間唔時都想食下街坊野，今晚搵到間好坐既串燒店。燒蟶子非常出色，大愛蒜蓉唔洗本咁鋪滿哂成條蟶子，香口到爆。 最重要當然係蟶子本身夠哂大隻厚肉，勁鮮甜，60蚊一隻我覺得物有所值。開邊虎蝦真係夠大隻，食得出係新鮮係街市買返黎開邊。原條蒜香茄子可以話係性價比之王，大大條食極都仲有。 鐘意茄子燒得熟透好腍滑，雖然調味睇落好深色咁，但食落唔會太咸，食到食材原味。清酒蒜蓉焗蜆份量好多，蜆肉係彈牙鮮甜既，但個人覺得再大隻d減份量會更好。雞泡魚干幾有驚喜，燒得好香唔會乾柴，仲食到水潤既魚肉質地，仲有兩塊咁多，抵食。另外比較深印象仲有麻辣五花腩同焱燒自家製叉燒串，前者夠甘香有肉汁，後者自家調味勁惹味，有衝動即時encore多串。