Sodam Chicken (已結業)

平時食炸雞黎黎去去都單款或者雙拼，想食多幾款都唔得，勁冇癮。今次見上網推介Sodam Chicken有放題式食法，第一時間帶埋朋友仔上黎踩下場⋯ ✨炸雞焗雞放題 $178/位90分鐘放題，包齊多款口味炸雞、是日pizza、各款小食，全部都係任食。飲品雖然另外加錢，但買一送一都好抵，仲有幾款啤酒俾大家揀，岩晒「炸雞配啤酒」的你。 ⦁ 黑糖脆脆炸雞隻味係新推出，黑糖醬加埋粟米脆片，食落有種焦糖爆谷的感覺。黑糖味好重，岩晒飲開黑糖珍奶的朋友仔。 ⦁檸檬柚子炸雞都幾開胃，酸甜度適中，食落有種refresh的感覺。 ⦁黃金咸蛋黃炸雞對我興趣不大，但朋友食完再食，佢話有種流沙質地，完全係感覺享受。 ⦁蜜糖蒜香烤雞個人比較推薦尼款，蜜糖味重得黎唔算好甜，似平時BBQ的時候狂落蜜糖的感覺，但不失香脆的口感。 小食有泡菜、酸蘿蔔、涼拌水冷面、柚子醋沙律等，個人力推酸蘿蔔同柚子醋沙律，完全可以解炸雞既熱氣。 總結一下，試齊咁多款炸雞，每款都系熱辣辣，肉質唔乾好滑。重點全部都系無骨，岩晒「鍾意食炸雞但唔鍾意有骨」的女神。順帶一提，店內提供的手套好厚實，用完之後對手都係勁乾淨同唔油。