壹小店 (已結業)

假日嘅朝早需要一份豐富嘅早午餐，壹小店嘅食物就非常適合啦。首先睇落平平無奇嘅窩夫套餐就好有驚喜啦！你以為waffles肯定係配糖漿，點知原來係配喺香草腸上面嘅青醬，青醬唔跟意粉煮就比較鹹，所以少少份量已經好夠味。而窩夫嘅口感好鬆軟，唔係平時食開好硬好實嘅，幾特別！佢哋仲有香港cafe比較少見嘅西班牙蛋餅，估唔到個份量又幾大，仲跟咗個黑醋沙律同埋羅宋湯。蛋餅表面有加咗黑椒嘅煙三文魚，而蛋味好濃嘅蛋餅入面就有一啲薯粒、菠菜同芝士。口感因為薯仔同菠菜唔會太單調，但的確因為芝士同埋薯粒令人更快有飽足感，好飽！最後，店員仲驚喜送上兩個冬甩仔，即使好飽但都覺得好窩心呢！