麻甩佬狗仔粉 (已結業)

其實經過呢間舖頭多次都唔敢入去，因為個店名夠哂麻甩，好似好伏咁。但今日放lunch突然好想食狗仔粉，於是就俾次機會佢啦。餐廳樓面唔大，落單用紙仔形式。菜單選擇方面，除左有狗仔粉，仲有涼拌，滷味，小食，糖水同豆腐花，都幾多元化。我叫左一碗細既狗仔粉，但其實份量對女仔黎講都幾多。下午茶時段只係$24， 抵食！狗仔粉望落好普通咁，有幾粒豬油渣，幾片冬菇片同埋蔥作配料。重點係個湯底，湯底好重蝦味，見到細細隻蝦米、蝦皮，非常鮮甜。狗仔粉就不會過淋身，有咬口。每張檯上都會有調味架，包括菜脯（有辣有唔辣）、麻油、胡椒粉。食既時候每樣落少少，令成碗狗仔粉更惹味。另外仲叫左件滷水豆腐，豆腐有半隻手掌咁大，滷水入味，帶少少甜味，唔錯。總括黎講，係無咩期望下，呢間狗仔粉都算係性價比高，窮L恩物，我會再回頭。