E Molto Buono (已結業)

有一個鍾意食嘢嘅朋友真係好幸福，因為佢會成日帶我去唔同嘅餐廳，今次呢間餐廳，雖然喺銅鑼灣，不過近橋底附近嘅樓上餐廳，本身對佢冇乜期望，點知原來貌似舊樓，但一打開電梯已經閃閃發光，再入到餐廳，不論環境服務同食物都令我好有驚喜。晚餐每個人價錢九百幾蚊，頭盤我哋每人嗌咗一款，有吞拿魚刺身Tata醬，同埋燒鵪鶉，一上枱見到賣相非常精緻，吞拿魚配上海膽醬，放喺精緻嘅木盒上邊，除咗味道好好，放上網打卡一流。再來一碗蘑菇湯，極度香濃，每一啖都食到蘑菇粹，好香滑，超級好喝。另外燒長腳蟹上面有鹹蛋黃一齊燒，有2個層次味道，好好味！朋友叫嘅鵝肝，雖然我唔食，不過見到賣相好靚，而且煎得好香。然後主菜，我自己點左澳洲和牛面頰，入口即溶嘅感覺真係好正，最鍾意佢配上大量嘅蔬菜，令到就算食完成個主菜，都唔會有好溜嘅感覺。朋友叫咗m9和牛肉眼扒，朋友高度讚賞，佢話如果呢塊扒喺酒店度食，淨係呢塊扒都差唔多一千蚊，所以大家都覺得真係性價比高。最後甜品我點左粟子蓉甜品，唔會太甜，但食到好香嘅栗子味，連粒榛子朱古力都係脆卜卜，超級好味，真係多謝朋友介紹又食到一餐好好味嘅晚餐。