炎天丼 (已結業)

出邊熱辣辣今日就懶洋洋唔想出街，開個手機睇吓有咩外賣速遞，見呢間餐廳好好comment ,日本心發作底吓就叫黎試吓！落咗order冇幾耐就已經見到店家準備食物當中，唔使20分鐘熱辣辣嘅丼飯已經送到去屋企。天婦羅全部用紙袋另外包住，相信係索油之餘，又唔怕放喺飯面焗到淋晒。另外仲有一碗麵鼓湯，味道OK，唔會死咸。比較欣賞佢外賣盒嘅設計，碗蓋設計防止湯汁溢出，方便又安全。打開丼飯碗，一隻天婦羅溫泉蛋美美的躺在飯面，輕輕𠝹開，蛋汁溢出，丼飯即時充滿蛋香，蛋白仍是嫩嫩滑滑，處理得恰到好處。天婦羅方面，每款都好好味，天婦羅漿非常脆薄，內裏包着嘅食材仍然保持鮮嫩多汁，香脆之餘仍然食都食材嘅鮮味，特別一款要講技巧嘅海膽天婦羅，打開脆皮，食到紫菜入邊包住creamy嘅海膽，每款都令人期待，食得出師傅嘅心思同技術！喺香港，仲要係經過數十分鐘嘅外賣時間，仍然保持到呢個水準，實在非常難得。美中不足係丼飯雖然份量十足，但係質量一般，而且太過淋，黎到嘅時候呢有啲已經凝結左一嚿嚿，唔夠粒粒分明，呢個真係敗筆。