影片
更多
2004-12-16
15 瀏覽
報定案先，老細兼大廚係我的朋友，不過我冇股份的，嘻嘻！今年生日最重頭的一餐就係黎久未幫襯的喜宴食私房菜，佢未黎依家呢層時，一晚只可以坐兩圍半人，而且一晚一round，訂位要成半年。依家地方大左，仍然係一晚一round，訂檯快者一個半月就有，不過價錢亦都貴左，平日要360元一位，星期日做海鮮餐，每位要480元。個人認為大廚係好有心機煮每道菜，而且裝盤亦好認真，係做倒佢標榜的廚加藝兼備，但從材料來看的確係偏貴，抵唔抵食係見仁見智。講番食物，冷盤有五款，依次為胡麻溫室茄、阿姨仁稔、秘製肉鬆伴冷豆腐、芝麻脆花腩同芥末雲耳。主菜有鮑汁蘿蔔、口水雞、糯米粉蒸肉、香茅檸檬炸海班、梅子石榴、椰子炖雞湯、冬梅迎翠竹。甜品係自製香蕉雪糕。胡麻溫室茄即係用涼拌溫室蕃茄，四個去左皮的粉紅蕃茄原隻放在長碟上﹝其實每隻已切成八件﹞，淋上麻醬調的汁，再配上薄荷葉，單是賣相已非常討好。溫室蕃茄味道鮮甜而冇腥味，入口是非常清新，麻醬汁味道不會太濃，令蕃茄本身的味道保持鮮明，好味。阿姨仁稔係傳統醃漬食品，入口好有家庭味，個人認為送白粥一流，不過呢一味唔係人人鍾意食的。秘製肉鬆伴冷豆腐其實係好家常的一道菜，雪白的一大方絹豆
今年生日最重頭的一餐就係黎久未幫襯的喜宴食私房菜，佢未黎依家呢層時，一晚只可以坐兩圍半人，而且一晚一round，訂位要成半年。依家地方大左，仍然係一晚一round，訂檯快者一個半月就有，不過價錢亦都貴左，平日要360元一位，星期日做海鮮餐，每位要480元。個人認為大廚係好有心機煮每道菜，而且裝盤亦好認真，係做倒佢標榜的廚加藝兼備，但從材料來看的確係偏貴，抵唔抵食係見仁見智。
講番食物，冷盤有五款，依次為胡麻溫室茄、阿姨仁稔、秘製肉鬆伴冷豆腐、芝麻脆花腩同芥末雲耳。主菜有鮑汁蘿蔔、口水雞、糯米粉蒸肉、香茅檸檬炸海班、梅子石榴、椰子炖雞湯、冬梅迎翠竹。甜品係自製香蕉雪糕。
胡麻溫室茄即係用涼拌溫室蕃茄，四個去左皮的粉紅蕃茄原隻放在長碟上﹝其實每隻已切成八件﹞，淋上麻醬調的汁，再配上薄荷葉，單是賣相已非常討好。溫室蕃茄味道鮮甜而冇腥味，入口是非常清新，麻醬汁味道不會太濃，令蕃茄本身的味道保持鮮明，好味。阿姨仁稔係傳統醃漬食品，入口好有家庭味，個人認為送白粥一流，不過呢一味唔係人人鍾意食的。秘製肉鬆伴冷豆腐其實係好家常的一道菜，雪白的一大方絹豆腐置於灑左麻醬的黑醋汁上，上面鋪滿炸脆左的乾蔥，再灑滿肉鬆，頂上放左一大隻鮮黃色的大辣椒，賣相是不錯，味道亦佳。呢一味係同檯大部份女仔的至愛，個人則認為係不過不失，因不見功夫。芝麻脆花腩係我是晚的冠軍，薄薄的花腩充滿南乳味，外裹一屠薄粉同芝麻，香脆美味而且一點都不油膩，係見功力之作！芥末雲耳味道OK，用的汁料卻唔係太食倒芥末味，係不過不失的一味。
主菜方面，鮑汁蘿蔔是將用鮑汁炆好的蘿蔔切成圓段﹝每段已切成四件﹞，一排五個上碟，賣相亦是不俗。鮑汁不會太膩，但蘿蔔略嫌有點苦澀味，相信是主廚想保持食材原味而沒有用冰糖煮，但所用蘿蔔卻不夠好呢！口水雞是招牌菜，開業以來，菜單點轉都仍然保留在案。由於同檯都不嗜辣，所以辣油另上，雞肉是拆了骨的，配上滑滑粉皮同皮蛋、芫茜，是非常美味的一道菜，可惜我們食的是少辣版，未能品嚐口水雞的麻辣。糯米粉蒸肉是另一驚喜之作，竹籠內是荷葉包著的糯米及非常軟腍的牛﹝真係腍到用筷子輕輕一夾便分閞﹞，荷葉的香味消除了牛肉的油膩，係另一見功夫之作。不過同檯有人認為糯米太少，唔夠喉。香茅檸檬炸海班係將成條海班油炸，再淋上香茅檸檬汁，味道不錯，不過條魚有D瘦，唔係太多肉食，個汁幾清新，可以在中場時份為大家消消滯。梅子石榴是間場的涼拌食品，石榴用梅子醃過，多了一點微酸和有深度的甜味，廚師為左美觀，加入左富士蘋果，紅綠相間，賣相自然是好的。石榴本身「鞋鞋地」的質感可以去除味蕾上的殘渣，老人家話可以增進食慾同清潔口腔呢！間場目的是為了令大家可以好好品嚐下一道椰子炖雞湯，呢一味係樸實的一道，湯好清而帶椰香，幾好。冬梅迎翠竹係敗筆的一味，冬梅即梅菜，翠竹係西洋菜莖，兩者味道實在唔夾，食起來是梅菜還梅菜，西洋菜還西洋菜，各不相干。
最後係甜品─香蕉雪糕。雪糕顏色微啡，明顯是因為新鮮香蕉肉沒有添加阻止甪氧化的檸檬汁，因為後者會影響香蕉的味道。香蕉雪糕好有香蕉味，而且非常滑，好好味，不過我已經食得好飽，冇能力添食了。同檯兩位有多一個甜品胃的女士就添食多一份，犀利！完場係一個shooter ，酸酸地，有青檸的香味，好醒胃。大廚話明有加入酒精類如威士忌等，但因為飲落唔太覺有酒味，所以同檯一位不嬲一飲酒就唔掂的女仔連飲左兩杯，結果落到街已變身為一隻小溫室茄！
張貼