中環茶記 (已結業)

近來某社交平台好多人介紹呢間茶餐廳，上星期有一晚放工見冇嘢做就去試吓。中環呢排夜晚都水靜蛾飛，所以都唔使排隊。一坐低望餐牌都幾多款式，有小菜、鐵板、咖喱等等。第一次幫襯都係叫幾樣王牌試試先。沙嗲牛肉菠蘿包菠蘿包唔會鬆泡泡，好有口感。牛肉肉質幾鮮嫩，唔似用生粉乸過，而最重要嘅沙嗲汁亦都好濃味。如果成個包熱啲會更加完美。芝士肉醬焗薯條菠蘿包套餐包埋，薯條都幾大兜，配肉醬係非一般食法，都幾特別。日式鰻魚炒烏冬一上枱就俾佢嚇親，條鰻魚仲長過我隻手掌。鰻魚汁甜度適中，同烏冬出奇地好夾。同埋我最怕炒烏冬好多油，呢碟就剛剛好。王牌雜扒分別有豬扒、雞扒、薯條同一條司華力腸，配黑椒汁。豬扒厚度差不多有3cm，好鬆軟。其他嘅味道不過不失。龍鳳檸樂同埋凍檸茶都係餐飲，龍鳳檸樂唔使加錢，最開心😬😬😬。