有蒸氣 海鮮石鍋專門店 (已結業)

成日都打邊爐其實都幾肥又會熱氣 今次就係尖沙咀搵左間蒸氣海鮮鍋食 呢度位置係天文臺道個度 行少少就到 今晚係平日 都算多人 黎到有好多選擇款套裝 可以散叫。有唔同海鮮配料個啲我就揀左個海鮮餐再加黑松露蒸蛋 雖然揀左套餐但都要再揀粥底定湯底 因為想清啲驚粥底會太飽😂所以我地就揀左鮮響螺竹絲雞湯底 揀晒野食但啲野食未到 就食左佢前菜青瓜同花生 青瓜酸酸辣辣都幾開胃 同埋店員拎左醬油架俾我地自己調味 都係平時個啲蒜呀辣椒豉油。不過海鮮應該都自帶甜味 唔洗點點呢度食蒸氣鍋有店員幫我地落野食計時唔洗自己黎 正！ 先黎嘅係黑松露蒸蛋 食落好重黑松露嘅香味同埋蛋好滑 之後就有鮑魚同沙包蜆 鮑魚食落都幾爽口反而蜆就有鮮味 都鮮甜 蝦就一串串咁上 食個陣方便啲 同埋係蒸出黎 所以唔會整污糟手 都好甜 唔洗點豉油都好好食然後就有個蒜蓉粉絲蒸元貝 好鐘意佢夠香口 同埋元貝大大粒 仲有桶蠔就夠肥美 薑蔥蒸鮮魷就份量幾多 食落都幾爽甜 仲有豆卜添 索左啲海鮮味 手剁豬肉丸同墨魚丸就夠彈牙唔會肥膩 最後黎嘅係金銀蒜蒸勝瓜 好香蒜味 到最最後就飲埋個湯 因為索左頭先啲海鮮味所以個湯變得好鮮甜好好飲 下次黎會揀佢嘅粥