影片
更多
2020-05-15
190 瀏覽
睇完食評以為唔差，點知偏偏俾我哋遇上一連串不知所謂的經歷，我發誓冇下次之餘，亦希望有興趣幫襯呢間餐廳嘅大家，參考完我經歷後再諗清楚係咪要冒呢個險。早個多星期已訂座同男友食晚飯慶祝生日，訂咗18：30，當天接到店員致電，想我哋提早半個鐘，即18：00到達，雖有啲趕，但我哋願意配合。到達後，員工放低餐牌叫我哋睇，我奇怪，我透過系統訂咗$1416嘅二人12道菜tasting menu，點解仲要睇餐牌？嗰陣個場得幾枱，我附近嗰枱有一家4口，有位男員工好落力咁serve佢哋，期間我哋冇人理，冇講解，冇同我哋有eye contact，第一次來，唔知點好，等咗一輪唔知咩事，送咗杯海藻球七喜嚟，咁係咪佢哋知我訂咗餐唔洗再confirm？咁大家就飲啦！嗰枱一家4口仲同緊男員工打牙骹，未落order。飲完同食完海藻球七喜，等咗45分鐘都未有下一道菜，但一家4口已食緊第三道菜，期間忍唔住問係咪漏單，問咗兩次，終於送來溫泉蛋沙律，一邊食我一邊諗，點解要我哋提早半個鐘到？趕頭趕命嚟到竟然都係要等？點解？食完，繼續等，等到天荒地老，見到一家4口嗰枱嘅食物係一道接一道，點解我哋要等咁耐？員工、經理又會向佢哋介紹菜式
早個多星期已訂座同男友食晚飯慶祝生日，訂咗18：30，當天接到店員致電，想我哋提早半個鐘，即18：00到達，雖有啲趕，但我哋願意配合。到達後，員工放低餐牌叫我哋睇，我奇怪，我透過系統訂咗$1416嘅二人12道菜tasting menu，點解仲要睇餐牌？嗰陣個場得幾枱，我附近嗰枱有一家4口，有位男員工好落力咁serve佢哋，期間我哋冇人理，冇講解，冇同我哋有eye contact，第一次來，唔知點好，等咗一輪唔知咩事，送咗杯海藻球七喜嚟，咁係咪佢哋知我訂咗餐唔洗再confirm？咁大家就飲啦！嗰枱一家4口仲同緊男員工打牙骹，未落order。
飲完同食完海藻球七喜，等咗45分鐘都未有下一道菜，但一家4口已食緊第三道菜，期間忍唔住問係咪漏單，問咗兩次，終於送來溫泉蛋沙律，一邊食我一邊諗，點解要我哋提早半個鐘到？趕頭趕命嚟到竟然都係要等？點解？
食完，繼續等，等到天荒地老，見到一家4口嗰枱嘅食物係一道接一道，點解我哋要等咁耐？員工、經理又會向佢哋介紹菜式，傾計、social，唔通佢哋係VIP？雖然我哋唔係話好希罕食飯時俾人招呼到咁，但感覺好厚此薄彼，俾人冷待咁，我哋衰咗啲乜？🙄
隔離枱兩位客人遲我哋成個鐘入座，但都冇我哋等得咁慘，仲要係一道未食完下一道已上，我哋又唔係食咩特別菜式需時處理🤦🏻♀️一邊等食一邊餓，未食過一餐飯係愈食愈餓嘅！
雖然冇人entertain我哋，但頭幾道菜都叫有人話我哋知係乜，食咗第4、5道之後，已經冇人同我哋講嘢，送上枱就走，佢哋菜式咁新派，就算擺落口都未必知道自己食緊乜，我唯有開住openrice，睇返之前啲食評，對照下我食緊嘅係乜東東，呢種經歷都幾難忘，我知我享用緊買一送一優惠，原來要受到咁嘅對待😒
訂枱時系統有特別要求一欄，可以註明慶祝咩特別日子或紀念日之類，好user-friendly，咁我緊係註明慶祝生日啦！以為佢哋會有小小安排（廣告話生日幫襯送甜品一客，唔係貪心，餐廳冇安排嘅咪我安排囉！有安排我咪靠餐廳囉！），但咁唔尋常嘅服務我已打定輸數，佢哋亦冇令我失望，真係乜都冇預備到㗎！咁個系統設定要嚟做乜？🤦🏻♀️
聽到員工同其他客人介紹12道菜大概食個半小時（我都係聽到人哋講咋，冇人同我哋講解㗎！陰功！），我哋食一樣嘅12道菜，食咗3個鐘，每道一、兩啖食完，食完好似冇食，唔緊要，最緊要係消磨我生命（唔係我誇張，時間就係生命！），我唔認為呢間嘢算係Omakase，我只會稱作新派菜式，咁嘅服務態度我不敢恭維，如果人人都係要等上菜等咁耐，我應該冇嘢好講，最多覺得自己唔啱食，試過就算，冇下次，但我見附近客人，就算遲我哋嚟嘅都上菜快過我哋，咁係咪唔尋常呢？最後我都忍唔住向經理了解下，並表達被要求早到30分鐘但等食等45分鐘嘅不滿，其次就係佢哋上菜同事冇乜介紹，我唔知自己食緊乜。經理除咗講唔好意思，就係話員工好新，自己本來做consultant剛接手呢間餐廳，之前個老闆有重病云云......聽完我好遺憾，當中嘅遺憾亦包括佢作為consultant嘅專業竟然發揮唔到，要顧客接受餐廳嘅失誤，令到顧客有遺憾。
用平價食材做12道菜，我唔評論，但理解創意係無價嘅，但感覺係佢哋食緊老本，sell 嘅係玩嘢idea，男友最唔欣賞係佢哋擺盤會將啲唔食得嘅嘢同食物放埋一齊，例如花盆、骰仔、金屬雀仔等，食之前要小心研究邊樣食得邊樣唔食得，或者有人會覺得好得意，但我哋唔識欣賞。最驚喜當然係服務態度啦！可能係我哋唔好彩啦！但氣場都好緊要，如果你哋表現到食得好開心好surprise，員工、經理會好樂意過嚟同你傾計social，好似我哋呢種冇乜交戲嘅（等食等到天荒地老，仲要扮開心？），上菜時擺低就閃人啦，理得你丫！
希望佢唔係消費緊黃色嘅名目，如果只係打正黃色旗號而不思進取，會連累埋成個圏而影響客人嘅信心。
補充一下，因為食食下冇心機，有啲菜式我冇影相所以冇得post，最終我有同經理講我用餐目的係為男友慶祝生日，佢驚訝狀，然後話補返個甜品俾我哋，我哋話唔洗啦！只係想快啲食完快啲走，走去食下一餐醫肚，但佢堅持送隻紅雞蛋扮嘅大菜糕嚟，嗰陣連最後一道菜都未上，我哋已埋單打算唔食走人。我好奇問佢，個系統可以讓客人註明用餐目的，但客人訂座時註明咗目的但你哋又冇安排，咁個系統有咩用途？作為前consultant嘅經理笑笑口咁話：“咁我依家咪安排俾你囉！” 嗯！算了！唔糾纏，都係嗰句，未食飽，速閃食下一餐。埋單$1300有找，唔係$1416咩？唔通俾咗折？錯了！之後先知雖然訂咗tasting menu，但原來佢哋一直俾錯咗$590一位嘅餐我哋食，我哋梗係唔知啦！事前冇招呼、冇講解、冇confirm，我哋乜都唔知但佢哋照出餐，慳返百幾蚊唔係壞事，但真係離譜！成世人未試過！！！
再再補充，第二日，openrice系統send電郵嚟，話我缺席咗呢餐飯🤦🏻♀️咁即係餐廳冇confirm我有出席啦！不知所謂！
報告真正完畢了！
0 瀏覽
0 讚好
0 留言
1 瀏覽
0 讚好
0 留言
張貼
