霞飛點心拉麵 (已結業)

一星期大大話話都有三至四日喺iSquare或K11食lunch，所以，好多餐廳都經已試過。通常，就算第一次印象普通，都會比多次機會。霞飛係屬於第一次ok，但第二次就發誓唔會再嚟嗰種。第一次，叫咗雪菜肉絲麵同一個配菜(唔記得係乜)，但出咗個水煮魚麵比我。我話錯咗，佢哋轉個頭又比返同一碗水煮魚麵比我。一check單原來落單個叔叔喺水煮魚麵嗰格加咗一棟，於是廚房誤會咗。雖然後來都比返碗雪菜肉絲麵我，但侍應嘅面口就唔係幾好喇……話說回頭，第一次碗麵其實係幾好食嘅。雪菜肉絲炒過另上，咸淡適中，所以我願意再去。第二次，門口帶位個叔叔個樣已經好串，唔願做，冇正眼望過我，隨便指一指示意我自己坐。都係叫咗雪菜肉絲麵，加油炆笋。個笋好硬好韌，根本咬唔開。然後，比咗碗魚香肉絲麵我……又錯？我馬上check單，點知今次係自己寫錯咗！因為都係肉絲，tick錯咗隔離。嘩！個大叔即時串到好似我欠咗佢咁。我自己錯，都唔係想佢換，但話晒都係客，駛唔駛咁受氣！結果，碗麵好甜，一啲都唔好食，油炆笋又甜又韌，我帶住一口甜耶耶食唔飽就離開咗。