Wanna Eat

營業中

休息中

好耐無寫過食評，心血來潮寫返篇近期印象較深的一間。話說有日收工後同埋隻熊出去新蒲崗個邊行下，見到呢間好似幾吸引就去左，間鋪位置幾好，鄰近譽・港灣，閒日夜晚去唔駛等位，但都叫多客。點左三樣野分別係黑松露薯條、想食・明太子意粉同埋海鮮意大利飯，首先來到既係意粉，個份量比想像中細，原本都唔太為意，但見隔離枱點同一樣意粉但眼見人哋個意粉大成兩倍有多，其實廚房一齊煮都好正常，但分碟應該留意返，攪到我個意粉兩三啖就無左，人地就食唔曬。講返食物，個意粉好一般，明太子味唔夠出，相信一般人上網學點整個效果都比佢好。而之後就上個意大利飯，個意大利飯原來係蕃茄汁，味道都唔差但唔夠入味，而海鮮就好一般。最後就係個黑松露薯條，佢個黑松露薯條好明顯係炸薯條之後再就咁放一 Pat 黑松露醬上去，對比起其他鋪頭將黑松露連埋薯條一齊炸或者係薯條上面灑上黑松露磨成既粉就遜色好多。但不得不提佢職員服務態度好好，會瘋狂咁幫你加水亦都唔該前唔該後，如果佢嘅食物質素可以提升返咁整體感覺就會更好。