中村藤吉香港店 (已結業)

大家都成日講起呢間抹茶甜品店，今日我終於有機會嚟試下啦！其實 miramall 樓上都有間備座位設置嘅分店，原來係好早 9pm 就關門，食咗閉門羹添！我哋今日咁啱都好想好想食抹茶嘢，所以走咗去地下嘅另一分店。地舖主要係外賣嘅，只係近門口位置有張小枱仔，但係無座位嘅。呢度反而售賣周邊商品為主，一大堆唔同種類嘅綠茶呀，餅乾呀等等。而且全部都係日式禮盒包裝，靚到爆！講返我哋食咗啲咩？咪就係抹茶金刨冰，咁就當然係抹茶口味啦（其實仲有培茶口味可以選擇嘅）！刨冰大大杯，所以價值 $65 一杯都可以接受啦！面頭係我最期待嘅抹茶軟雪糕，佢配有 mochi 同埋紅豆蓉。軟雪糕好濃滑，mochi 嚥嚥靭靭，而紅豆蓉同刨冰有又有咬口。抹茶味道清幽，又唔會太苦澀。最估唔到係食到底部都仲有抹茶醬，唔駛食到尾後得返啲刨冰咁可憐。