名豪海鮮火鍋專門店 (已結業)

琴日係個頭行街，search到附近有間新開既海鮮火鍋店，中意食海鮮既我就梗係要試試佢啦。舖頭選擇都幾多，湯底由普通既白湯底到麻辣同養生鍋都有，最後點左個豬腳＋雞胡椒湯底，個煲一拎上黎就見到個湯底係超吸引既奶白色！！問左老闆先知，個湯底係用真.豬腳同雞熬出黎，所以個湯底係可以飲嘎，建議大家食之前，可以飲翻碗先～（湯底～～～）火鍋料未上之前，頭砲係鱆紅魚刺身同埋兩個小食（炸雞軟骨&豆腐），我本身係唔食日本魚生既人，但係老闆強烈推介，咁我就試下啦。魚係淡水魚，本來好擔心會有腥泥味，點知完全無！！！口感仲好脆好爽口，實在係值得一試。（鱆紅魚刺身）（炸豆腐）（炸雞軟骨）火鍋料呢，選擇都好多，其中安格斯牛同自家製既丸就幾好，牛肉雪花均勻，食落唔鞋口，食得過。（安格斯牛）丸類大大顆，每顆裡面都有一顆可以拉絲既芝士，食得又玩的，蝦丸裡面有大大隻真.蝦，超爽口，可以一試。（自家製丸類）之後仲食左新鮮淮山，大大件，牛黃喉，打邊爐必備，好爽口，黑牛百葉，蓮藕啊，菜啊都好新鮮，重點係唔貴，料足！睇得出誠意十足，推薦大家一試～