鳳鳴石磨腸粉 (觀塘廣場) (已結業)

如果你係腸粉fans 又未試過皺皮腸粉，真係要食下呢種用櫃桶式鋼盤將米漿配料蒸好，師傅再推到扭埋皺皮既腸粉，包你鐘意，個樣其實同陳村粉有幾分相似，味道比飲茶既布拉腸更有米香，更加煙韌。鳳鳴仲有黑米漿同紅米漿揀（免費升級），真係櫃桶腸粉界既極至。獨家配料：炒芝麻、炸蒜、芫荽、蔥花、麻油，可以自由選擇全要/走某款/份量多少（建議全部要齊因為好好味）。醬汁有自家製作麻香汁（小小麻辣一定要試下，好夾腸粉，另外加咗支拎番屋企撈麵）；辣椒粉；腸粉豉油。手撕雞腸個胡麻醬同麻香汁天作之合，雞肉本身都有調味，夾埋落黑米腸粉，食到冇停口，套餐有埋小食，要左六粒燒賣，點埋個汁醬一流。石磨雞蛋粟米豬肉腸，櫃桶腸粉經典組合，小食配三隻白菜豬肉餃，真係冇誇張、好好味，跟餐飲品有豆漿/ 竹蔗茅根/ 桂圓紅棗/ 羅漢果，都係夏天良伴。