峴港越式料理 (已結業)

行下行下，見到呢間越南嘢，就走咗入去食。Lunch hour，人流多，全餐廳滿座，好彩我地早一步，啱啱有張吉枱，唔駛等位就可以入座。我同朋友分別叫咗火車頭湯河、香茅豬扒飯、檸檬薄荷梳打、咸檸蜜。香茅豬扒飯: 睇落好吸引，除咗豬扒之外，仲有一舊蛋卷同埋沙律菜。豬扒份量充足，夠曬飽肚。火車頭: 有生牛肉、牛丸、扎肉、白蘿蔔……湯頭雖然清淡，但幾樣配埋一齊都幾好味。以呢個價錢嚟講，已經係唔錯。咸檸蜜味道調得適中，不會太咸，甜甜地易入口。檸檬薄荷梳打: 調味適中，有大量檸檬葉喺入面，青檸加薄荷嘅配搭，十分清新。