萬發海鮮菜館 (已結業)

好耐無黎食，於是星期日晚就去食晚飯。由於去到時時間尚早，唔洗等，不過都坐滿約七、八成。頂湯雞腳煲上次見人食，好似好正咁，我地今次又試吓先！個煲好大，除咗雞腳，仲有豬皮。雞腳有成十幾隻。炆得都好淋，但又唔淋到一pat pat。雞腳似新鮮雞腳，細細隻，但幾肥美。豬皮正，吸晒頂湯味，不過就較肥。但頂湯幾杰身，味濃不會過咸。薑蔥桶蠔之前試過砵酒生蠔，味道麻麻，所以今次試薑蔥整法。點知佢話無生蠔，得桶蠔，都無所謂，只係價錢貴幾廿蚊。桶蠔較大隻，差不多係一隻桶蠔=2隻生蠔。一煲有4隻桶蠔，隻隻都好大好肥美。除咗4隻桶蠔外，全煲都係薑蔥。桶蠔用粉漿包上，再去炸。粉漿略厚，而且無味。桶蠔新鮮蠔味重，肥美，無沙無碎殼，啖啖肉。但除咗蠔本身的味道外，醬汁味道不濃，而且也未能完全滲入蠔中。萬發石頭飯差唔多次次都會食。水準依然啦！飯粒乾身，料足。又能保溫。石頭雪菜蘭片呢個都係用石頭窩送上。芥蘭片切得厚度適中，入口爽脆。面頭撒上已炸至乾身的雪菜。底部亦有肉碎同辣椒碎，帶點辣味，幾惹味。送飯不錯的選擇。