紅椒力量 (已結業)

可能天氣影響突然想食啲星馬泰嘢所以就揀咗屯門v city嘅紅椒力量。打響頭炮係一個青咖喱牛腩飯，因為空肚唔想太辣傷胃所以要求咗少辣，果然來的青咖喱濃而不膩加上牛腩部分喺厚切長條型所以好有口感！之後來個香口嘅椒鹽鮮🦑間間埸，因為啱啱炸起所以特別香，椒鹽粉漿薄薄地剛好包住鮮魷，而魷魚又大大塊夠𡁻口，食完一舊接一舊停唔到口🤭，同時配杯三色冰解解喝，而三色冰雖然椰汁味夠但啲三色珍多就無乜味同無嚼口，因此即時再叫杯泰式青🍋七喜清新吓，如果飲呢個記得要篤到啲青檸出晒味先好。先前食咗個🍚所以想要多個粉於是叫咗個馬來海鮮喇沙金邊粉。湯底椰香味濃但辣味方面就唔夠，因為喇沙一定要有啲辣先恰當。另外食呢個金邊粉係要同時間競賽因為啲湯眨吓眼就俾啲粉索晒，食得慢嘅話分分鐘未食完就乾塘😆。跟住再來個辣椒膏炒青口填補吓，我最鍾意呢個因為啲辣椒膏緊緊地包住每隻青口，而且青口炒得剛好唔會韌。最後想食埋馬來薄餅先夠全面，所以叫多個黃咖哩🐂肉配馬來薄餅，同樣係椰香味夠但咖哩香料味不足，牛肉淋而且牛肉份量都唔少反而薯仔就少咗啲。至於我心目中嘅主角薄餅就冇令我失望，外脆內軟所以就算齋食都好味，點咖喱汁食又另有一番風味。