Manecy's Studio Restaurant (已結業)

靚靚媽咪近日每晚都喺度追睇鼎爺教煮餸，所以一聽到契妹週一話去書展，XO仔就立即搭單叫佢買多幾本《鼎爺廚房》俾家中o既廚神們，並相約週三晚交收，順便一試銅鑼灣區內仍在試業中o既樓上西餐廳「Manecy's Studio Restaurant」。「Manecy's」o既紅磚牆襯梳化椅極富歐陸風味，加上服務生親切體貼，環境大方得黎好溫暖。四頁餐牌做到好似成份報紙咁，打開翻閱更覺輕鬆隨意。炭燒香脆扇貝（$98）：熱辣辣o既扇貝幼嫩軟腍，惹味得黎不失鮮甜。黑松露雜野菌披薩（$128）：薄薄o既披薩批底極之脆卜卜，雜菌芬芳輕巧，食落一啲都唔油膩，一個人食哂真係話都冇咁易。因為早一晚食放題飲咗三個鐘頭啤酒，腸胃都未趕得切消化，晚飯就決定唔食甜品，只係飲咗杯特濃咖啡。點知見到契妹所點選o既「特式紫蕃薯朱古力盤栽」實在太過精美，結果都係忍唔住要影幾幅相同大家分享一下。