一鳴拉麵

營業中

休息中

📍啲人都話大埔多嘢食，今次嚟到大埔墟梗係要搵好嘢食！好耐都冇去過日本呀，唔知大家會唔會思鄉呢？一鳴成間舖頭主要嘅建築素材都係木，望落就好日本feel，好似橫町窄巷嘅一間居酒屋咁。🔻入到去成個舖頭都係細細間，窄長型，一行窄木臺沿着廚房延伸，好似日本當地拉麵店，中間area有幾張四人枱，位置唔算多。所以去到食飯時間七點幾都幾多人喺出面等，不過我哋六點幾就到所以都唔使太點等位。🔻見到啲嘢食都唔算貴，一碗拉麵差唔多$80，加其他小食都係幾十蚊落枱，拍拖放工同人哋食嘢，喺呢度都唔錯，低消費得來，氣氛又靜靜地，好啱當去轉旅行，放鬆一下心情🌼🔻豬骨濃湯拉麵（$78）好似點車仔麵咁，有得揀面嘅曲直、硬度，要唔要蔥同埋要豬軟骨/叉燒，都幾客製化，小店嘅做法同大型商鋪果然唔太一樣，盡量還原番原汁原味。唔駛等好耐就上枱，由於我同個朋友都鍾意經典豬骨味拉麵，所以大家都掂左一模一樣嘅，不過有驚喜！湯好濃稠，唔係味精嗰種濃，而食到一啲豬骨嘅鮮味。加上曲面更加能夠掛湯，唔係出邊湯同面分離嘅感覺。加上佢比豬軟骨都俾咗好大舊，足足有1/3個碗❤️佢炆得好淋，啲軟骨入口即化，非常滿足，加上湯汁加持，用到好似jam住個口咁。