泰好味 (已結業)

本身諗住去街市食素，不過下午2點都差唔多收曬，又行到熱辣辣見到有間泰國野有冷氣好似坐得幾舒服咁，就入去醫肚啦！價錢唔貴，lunch都有十幾款揀，大概$35左右包飲品，有炒飯有滷豬髀肉飯濕炒河等等，我地叫左冬陰功湯河 & 泰式炒金邊粉 (phad thai)，估唔到咁好食超級正宗！首先個冬陰功好濃，香料味好重好香，個碗你會見到好多香茅檸檬葉等等，唔係一般既湯底佢直頭係冬陰功湯！平時湯底會淡味左/好人工味，呢碗係用心用料去煮，又大碗又有蝦，唔算好辣食少辣既人都食到！另外phad thai都係好好食！正宗過某啲高級泰國餐廳好多！好大碟，用雞絲炒，金邊粉口感啱啱好。雖然無青檸&蔥伴碟，不過本身應該有落糖，唔使加任何野已經好好味，而家諗起都想再食😋無諗過平過茶餐廳價錢但食到正宗味道！會唔會太抵食！感覺好似置身泰國🙈服務好親切，應該係一對泰國夫婦做，開全日，下午3:30-6:00pm係休息時間，座位唔算多，可能小規模，無特式飲品（即係龍眼冰三色冰果啲），但有新鮮椰青，lunch都係加+$15，好抵飲。