粵來順 (已結業)

由於有個好朋友介紹我們話喺旺角登打士街嘅「粵來順」嘅招牌生磨杏汁白肺湯同其他小炒都非常出色，叫我們必定要去食，兼且畀咗個溫馨提示我們話呢間店晚晚都全場爆滿，要早啲去食，所以我們今日下午就去咗食午飯！我們叫咗招牌生磨杏汁白肺湯「大」一打開個蓋就有好芳香嘅杏汁味香氣撲鼻，店員同我們講話他們係每日新鮮即磨杏仁同湯料非常足料有清洗得超乾淨衛生嘅豬肺、瘦肉、鷄腳、馬蹄、白果去燉製幾個鐘，所以湯底超級香滑濃郁，味道極之清甜鮮味，飲完令人有一種好滋潤嘅感覺！薑蔥魚鰾煲係用一個燒到熱辣辣嘅鍋盛載著上碟，魚鰾嘅質感非常爽脆，而且吸收晒爆得好芳香惹味嘅薑蔥味，真係超正呀！乾炒牛河嘅河粉好煙韌軟滑，牛肉嘅肉質好鬆軟，而且炒得好乾身同好入味！香煎腐皮卷聽店員話他們係用新鮮嘅腐皮自家包製，所以腐皮嘅質感好軟熟，而且相當薄身，同埋他們係即叫即煎，煎到外層好金黃香脆，而唔係平日食開用油炸，所以完全唔會有好油膩嘅感覺！蒜蓉炒蕃薯葉炒得鑊氣十足，蕃薯葉嘅質感相當爽甜！總括：店內嘅環境裝修充滿著懷舊風味，聽爹哋話好有六七十年代嘅茶居感覺，有吊風扇、餐具同鐵窗花等等等等⋯⋯真係別有一番風味！