甜品老媽 (已結業)

呢一日食完安利魚蛋後，就諗住無可能淨係食一碗魚蛋粉就返屋企咁蝕章架嘛，而且東大街又成條街都係美食 ...結果就當然上OPENRICE睇下有咩出名嘅食店啦。後尾就畀我發現到呢間甜品舖嘞。　　大家食開安利都知道19:00就會閂門，咁我食完安利大約6點幾嘅時段係未有人食甜品嘅時段，所以入到去係得一兩枱客。去到諗咗無耐就決定叫心太軟。個心太軟一嚟到，我覺得個擺設真係幾有心思。平時去親其他甜品店食心太軟多數都係得一舊雪糕同一舊心太軟，而呢間舖加埋呢條糖絲（係咪應該咁叫？）就真係畫龍點睛咗，而且仲食得落肚添 。呢個心太軟未用叉切到底已經標晒啲朱古力出嚟，一食落去真係有種濃濃嘅朱古力味而我亦覺得佢用嘅朱古力純度大約係５０％左右，雖然係較甜但亦都仲嘗到少少澀味，最緊要係迎合到一家大細口味嘛而且佢暖暖嘅朱古力醬配上冰凍嘅雲呢拿雪糕球，個口感完全可以用「冰火交替」嚟形容！ 　　食完呢餐甜品，先至為我今次嘅「筲箕灣尋食之旅」畫上完滿嘅句號 。