大尾篤燒烤王 (已結業)

我經常覺得如果要攪食肆嘅話，最好賺就應該做燒烤場。用燒烤場，唔駛請廚師，剩係醃好啲食物就攪掂。由是故，從來唔會提議去燒嘢食。不過，燒嘢食都有一個獨有嘅優勝之處，就係燒得好食與否，完全係「個人問責」，與人無由。除非有人幫你燒啦，好似我同阿K咁。今次一大班老友記山長水遠嚟到呢度燒嘢食，一嚟聚聚舊，二嚟係同我地嘅老友記W「律B」餞行，因為佢會去上海公幹至少三個月。在此希望佢可以順順利利，最好搵到個如意郎君(按：W「律B」並唔係只得內在美，外在美一啲都唔輸蝕，阿K都讚不絕口)，了卻我地成班人嘅心願。言歸正傳，講番燒嘢食。個人認為，除咗食物要醃得好之外，爐火都好緊要。雖然燒嘢食之前一晚落過吓雨，但係啲炭仲可以保持乾身，所以起嘅火十分靚，燒起上嚟，想唔好食都幾難。查實食物醃得都唔係話好出色，燒完嘅味道都中等。味道都係其次，最重要係一大班人可以一齊燒嘢食，一齊談天說地，正如某廣告話齋，此刻無價。換取一刻無價，我地要付出嘅金錢唔多，只係每人七十蚊。