爭鮮迴轉壽司 (大埔廣場)

營業中

休息中

自從有次爭鮮堂食後，發現啲壽司唔新鮮之剩衞生情況又麻麻，有啲壽司連蓋都無，而且裝壽司既碟又有漬，所以之後食爭鮮都係買外賣算了，事隔多年今日就再試下堂食既質素，不過今次就係第二間分店堂食，依家做梗碟碟八蚊優惠。😍三文魚都算肥美。呢款係堂食產品，芝士蟹肉玉子燒，味道唔錯，不過口感就硬咗啲。呢款壽司個樣幾得意，重以為係咩魚咁特別，原來係燒粟米壽司嚟，估唔到連明將既款式都會係度出現。不過當我坐耐咗問題就出現喇，我發現迴轉帶啲壽司係完全無出過新既。。。。同一碟既海膽軍艦係我面前不停出現，果碟海膽軍艦本身都幾靚仔吓，但經過一個半小時後，我見證住佢啲海膽開始溶化，我真係唔知佢究竟係度放咗幾多個鐘 🥶 壽司款式真係無嘜，只覺得前菜就最多，因為無人食所以都應該放咗重耐，當你每食一碟壽司，廚房又唔出啲新，變相只得啲無人食既壽司同前菜係迴轉帶上，到唔知邊枱新客入嚟食咗佢，加上又好似無得order，感覺啲新客人入嚟係食啲唔太新鮮同無得揀既壽司同前菜。