朱敏記桑拿菜 (已搬遷) 新店位置

班朋友係土瓜灣附近打完波，我過去撐下場，完左就去左附近既朱敏記桑拿菜食埋晚飯傾陣計先走人，可能閑日唔洗點等位好快就有位，呢度坐位幾闊落舒服！ 成班餓鬼個個掛住食，平時相機食先既習慣，今次完全冇人記得影相，食到條龍躉因為蒸得好靚先醒起影左一張！霸王花龍躉蒸既時間控制得好好，岩岩熟魚肉仲又少少痴骨，魚又新鮮，條魚食落口勁滑，放埋彊蔥辣椒一齊蒸，增添一份香味，最值得一讚師傅個豉油煮得都好好味，淋上魚身上，更加好味！ 椒鹽魷魚，炸粉薄厚份量岩岩好，外面脆卜卜，裡面又夠爽又夠熱，味道都調得唔錯！ 菜芯炒牛肉，菜芯好嫩好甜，牛肉份量都好多，炒得唔會過火唔會過韌！ 招牌乳鴿，炸得熱辣辣金黃香脆，調味唔會過鹹，肉質結實唔會淋！ 粟米斑塊，斑塊炸得岩岩好脆脆地，醬汁味道唔錯，份量亦算多，配埋幾個飯幾個都飽晒！ 呢度最值得一讚，侍應服務好好，又唔會追你埋單走，同即叫即煮熱辣辣上枱，餸菜食起上更加覺得好味！