船皇 (厚福街) (已結業)

呢餐其實舊年食，仲諗住出唔出 post 好，不過見個 menu 雖然係期間限定，但大部份食物都係恆常供應，所以都記錄一下啦。呢個 Mirror 成軍三周年套餐（二人餐）包括 One and All 船皇船麵兩碗，神隊友雞翼 12 隻同埋飲品兩杯。船麵有四種麵底可以揀，食材包括牛腩，和牛，牛肉片，豬腩片，牛肉丸，豬肉丸，豬潤，雞翼，雞絲同炸豬皮，加埋麵同湯底，剛好 12 樣，唔知邊樣代表邊個😆。本來我麻麻哋鍾意食船麵，因為硬係覺得啲湯底好鹹，次次食完都勁口渴，不過呢度嘅船麵有驚喜喎，除咗兩種肉丸較淡口外，其餘食材味道唔錯，湯底更加係濃而不鹹，OK 喎👌。神隊友雞翼係單骨雞翼，炸得幾香脆，點埋甜辣醬食，好惹味，食下一隻食下一隻，眨下眼就食哂😂。於是就散叫多個炸雲吞皮，呢個純粹係口痕用嚟攝牙罅😆。兩杯飲品都有幾高汁，姜糖必飲嘅姜糖茶薑味好強，巧妙地化掉茶葉中那點苦嘅甜蜜泰式奶茶茶味香濃，銀色嘅器皿仲非常靚，望見都開心🤩。