譽小館 (已易手) 新餐廳

其實上水酒樓一般都係水準比較差，所以我冇抱太大期望咁入去食，點知叫咗幾樣，佢每樣都係我心目中嘅水準之上，好有驚喜呀！小籠包外貌普通，唔算好多汁，但總算啖啖肉都濕，唔會乾爭爭。黑松露帶子餃，入面係啖啖嘅蝦肉，就好似蝦餃上面加咗帶子同黑松露咁。薑蔥牛肉雲吞撈麵，冇加其他醬油，有啲淡，但冇味精好健康。藥膳雞腳，味道有啲似老火湯，藥材味唔係太重，但煮得唔會太淋，又唔會太硬，口感好好。點心紙上有魚皮，喺香港好少地方有得食，諗住買來試吓，點知佢話冇，有啲失望。以往喺上水飲茶，都冇乜邊間好食，依家終於有一間唔錯嘅點心舖，以後會多啲幫襯。