好時沙嗲

營業中

休息中

位於尖東嘅好時沙嗲，由十幾年前學生時代已經幫襯，咁多年嚟分別同過屋企人、同學、同事嚟過，對我講係一間回憶滿滿嘅餐廳。前排去紅館睇演唱會，就順便嚟食晚餐。兩個人點咗海南雞飯、炒貴刁、巴東牛肉同薄餅。落單後幾分鐘海南雞飯就上枱，好有效率。海南雞肉質嫩滑，而且完全無骨，啱晒我哋呢啲唔鍾意𦧲骨嘅人。雖然係三黃雞但唔覺得太肥膩，只係稍嫌雞皮唔夠爽彈。正宗海南雞以用雞湯同薑蔥蒜浸熟，所以本身係無乜鹹味只有鮮味，主要靠蘸三種醬料嚟調味。油飯味道夠濃，油香突出而且油潤感十足，飯嘅軟硬度亦適中。炒貴刁好有鑊氣又惹味，食落比較辣。貴刁每條上色均勻，賣相好靚，比起一般河粉更煙韌有咬口雖然偏油膩，但炒粉麵唔夠油就唔好味嘅。配料有蝦仁、臘腸同芽菜，臘腸甜甜地幾好味。巴東牛肉香料味同椰奶味濃郁，食落少辣。牛肉份量好多，有啲比較大舊，有部份已經散咗變咗牛肉絲融入醬汁之中，配埋薄餅食就啱晒隔咗幾年無食，水準依舊，仍然係咁好味而且價錢好平，真係好抵食。