鐵板燒 (已結業)

好耐冇食太古城FOOD COURT嘅鐵板燒啦~重新裝修之後, o黎咗2位好高大嘅師傅, 手藝睇落好純熟, 決定再試吓... (裝修前D師傅水準越搞越唔穩定)同之前唔同嘅係, 之前D蔬菜係用錫紙上, 好易整爛食咗落肚, 而家轉咗用碟上...套餐嘅芽菜依舊, A菜變椰菜就有d失望, 仲多咗碟辣辣地嘅涼伴青瓜, 幾爽脆... 佢碗白飯OK o架, 粒粒米都咁大粒, 加埋黑芝麻食仲香d...椒鹽雞脾菇--新增菜式, 連蔥炒香好多, HONEY話味道都OK, 不過雞脾菇都係切薄片好食D喎...鐵板羊西冷--新增菜式, 好得喎D羊, 有羊味, 又唔韌, 一啖一粒SIZE啱啱好, 最正係, 黑椒同蒜粒份量任你隨意配搭, 以快餐o黎講簡直係超班!!!基本上芽菜椰菜雞脾菇都係用果4支調味料(豉油, 酒, 油, 水), 再加d蒜蓉或者黑椒, 所以無論你叫咩食, d調味大致上係一樣嘅... 今次呢2位師傅水準好平均, 比初開業時嘅師傅更加好, 希望以後都係佢地煮就好啦~