池記 (已結業)

好耐之前嚟過池記食晚餐，呢日上晝去開附近咁就嚟食個早餐，佢哋係以雲吞麵馳名，不過早餐嘅選擇就比較茶餐廳嘅感覺，選擇唔算多同埋係大路嘅嘢。朋友叫咗份沙爹牛肉麵餐，佢話個味道都OK。我就叫咗鮑絲火腿通粉餐，鮑絲同火腿絲嘅份量都幾多下。入面仲有三色雜豆，通粉煮得唔會太腍，湯底味道夠又唔會太重味精。早餐仲有奶油豬仔包，搽咗煉奶同牛油嘅豬仔包烘到脆脆地都唔錯。餐飲方面就有薏米水同豆漿等等，不過我哋就叫咗熱檸茶。