彩aya

營業中

休息中

唔係唔好食，不過有個致命傷加小缺點。特色沾麵個麵底係自己打，見到店頭間咗個位被俾佢打麵嘅，而麵有三款口味，今次試過黑椒味，即係混咗黑椒入麵底，出到嚟係未試過嘅。不過麵粗身而且偏硬，食起上嚟唔算好好口感。致命傷沾麵重點係湯要夠熱，因為當一浸啲凍麵落去，個湯就會迅速降溫，間間做沾麵嘅店都要用唔同方法保住溫度，當然都有好多店係由佢冷卻，呢間係其中一間。不過，叫得致命傷就冇咁簡單，佢地個湯係連第一啖都唔夠熱，接下來已經係完全唔使講，就係等佢慢慢變凍。小缺點個樓面職員都幾串，係個老人家黎，店內當時入座率只有五成，我嗌麵個時唔知道可以揀唔同口味嘅麵，佢講咗我知有三個口味，我問佢有冇推介，佢燥燥地好大聲咁重新讀多次三個口味，言下之意即係叫你快啲揀，觀感都有啲無禮貌。最後，提提大家，食完沾麵記得叫佢加湯，你可以飲埋個湯先走。