住家菜 (已結業)

想食得「無添加」d, 見呢度標榜無味精, 仲有乜都有的一人份量 set lunch ($55), 0黎試試佢個梅菜蒸肉餅.「是日例湯」係粟米紅蘿蔔豬骨湯, 又真係無味精喎, 飲落清潤, 好似屋企煲0既咁; 粟米細細件, 爽爽甜甜; 連賣相「湯渣」的豬骨都好正, 「窿窿罅罅」內的肉好鬆化鮮甜, 「輪」得過癮 令人滿意的一碗住家湯, 值得試試.梅菜蒸肉餅亦係住家的味道 -- d 汁好惹味, 送白飯一流; 肉餅彈牙肥美, 不過梅菜就好多「沙」0下, 食到「霹靂啪0勒」, 可惜.仲有「是日甜品」冬瓜水 (熱食), 賣相似鹹湯多 d, 食落好清甜, 冬瓜清香味好出, 十足0係台北華西街夜市飲過0個隻「冬瓜茶」, 清熱解渴, 唔錯唔錯.環境乾淨光猛, 梳化椅已好坐; 招呼就一般.$55 飽到上心口, 好食又比出面好多餐廳健康, 抵食. 銅鑼灣食肆選擇雖然多, 但無落味精的餐廳我相信一隻手數得晒, 呢度絕對幫襯得過的.可能你會問, 既然係住家菜, 點解要出街食, 唔自己郁手煮?咁... 都要識煮先得0架!