和氣食堂 (河畔花園)

營業中

休息中

今日同朋友嚟到沙田圍食晚餐，嚟到呢間和氣食堂食日本料理，到嘅時候七點半，已經滿座，外面仲有好多食客喺度等緊，可見呢間餐廳風評唔錯。白咖喱鳥冬配炸雞（$88）上層有打發起泡嘅cream，食嘅時候將佢同底下嘅咖喱烏冬撈勻，咖喱當中嘅椰汁味好突出，配埋cream做到香濃柔滑嘅口感，而讚岐烏冬，食落彈牙，同湯底非常配搭！至於炸雞，有三隻雞鎚，外皮酥脆，內裏仲保留到肉汁，雞肉嫩滑～5色海鮮丼（三文魚、鰻魚、帆立貝、拖羅、三文魚籽）（$128）除咗以上海鮮之外，仲配有玉子同青瓜。當中嘅三文魚切得非常之厚身，啖啖肉，而三文魚籽一d都唔腥，至於玉子食落去甜甜地，口感結實，非常好食～燒日本鄖島蠔2隻（蒜、燒芝士味各一）（$48）蠔最怕腥味，但呢間整嘅燒蠔一啲都唔腥，而且蠔大大隻，夠肥美😋，有兩種口味，配蔥蒜同芝士都好夾～芝士厚燒玉子（$42）食落去甜甜地，食落一啲都唔乾身，層層蛋之中仲保留到湯汁，玉子亦唔會煮得太老，好嫩口～溫泉玉子牛油果凱撒沙律（$58）第一次試溫泉蛋配沙律，估唔到溫泉蛋同沙律嘅配搭好夾，溫泉蛋可以調和蔬菜嘅草青味，配埋沙律醬、牛油果同多士粒，整體唔錯。