微辣大排檔 (已結業)

主要分咗4個區域 - 港澳渡輪雅座、港鐵車廂、娛樂空間麻雀枱、大排檔風格舊式冰室，各有特色，好啱打卡。四色搞搞震 （四色豬肉餃子8隻）用咗唔同顏色嘅餃子皮包，餃子炸得非常香脆，餡料亦有唔同嘅配搭，其中一個係粟米豬肉餃，粟米同豬肉嘅比例剛好，粟米嘅甜味加埋豬肉嘅香味，層次感豐富。懷舊蟹膏蝦多士多士上面蝦嘅份量好多，有厚度，鮮蝦彈牙配上香脆多士，一直係本人至愛，依家唔係太多地方有得食。旁邊嘅蟹膏入口香軟細膩，鮮甜微鹹，必點！紅燒沙田友乳鴿上枱好特別，乳鴿放係一個秤上面，大家第一時間都係打卡。乳鴿表皮炸得非常香脆，仍保持肉汁，肉質嫩滑。臘味滑雞火山石煲仔飯店員超好服務，會幫你落埋豉油，同埋焗一焗個煲仔飯，最驚喜係底部有香脆焦黃鍋巴，後來先知原來微辣大排檔雲集左米芝蓮品牌嚐囍。